اے لڑکے! اللہ کا نام لو(یعنی بسم اللہ پڑھو) اور اپنے داہنے ہاتھ سے کھاؤ

لوگوں کو مہذب بنانے، ان کے اخلاق کو سنوارنے اور کھانے پینے میں ان کے جاہلی زمانے کے آداب وعادات کو ختم کرکے ان کو سدھارنے کے لیے اسلام جن آداب واخلاق کو لے کر آیا ہے انہیں میں سے ایک ادب کا ذکر اس حدیث پاک کے اندر آیا ہے، چنانچہ کھانے، پینے، پہننے، اٹھنے، بیٹھنے، چلنے، پھرنے، سونے، جاگنے، زیارت وضیافت ومہمان نوازی کرنے اور ان جیسی دیگر لوگوں کی عادتوں میں نبی کریم ﷺ کے صحابہ کرام رضی اللہ عنہم اجمعین آپ ﷺ کے بتائے ہوئے آداب واخلاق سے آراستہ تھے۔

حدىث میں مذکور" اللہ کا نام لو" کا مطلب ہے کہ کھانے کے شروع میں بسم اللہ پڑھ لیا کرو تاکہ کھانا بابرکت، مفید، کافی اور شفا بخش ہو جائے۔

 " اپنے داہنے ہاتھ سے کھاؤ" یہ  بہت اہم ادب ہے، کیونکہ ہر اچھا کام داہنے ہاتھ سے کرنا چاہیے کیونکہ داہنا ہاتھ ہر اچھی چیز کے کرنے کے لیے بنا ہے اسی وجہ سے اسے عربی میں " یمین" (داہنا) کہتے ہیں جس کا مطلب ہے مبارک اور بابرکت۔

 " اور جو تمہارے سامنے ہے اس میں سے کھاؤ" یعنی پلیٹ یا تھالی میں جو آپ کی طرف اور آپ کے ہاتھ کے نیچے ہے اس کو کھاؤ اور جو آپ کے ساتھ والے کی طرف اور اس کے ہاتھ کے نیچے ہے ادھر سے مت کھاؤ، کیونکہ یہ ادب، شرافت اور اچھے مزاج کے خلاف ہے اور اس سے دوسروں کو تکلیف ہوتی ہے۔